سلام يا صاحبى

ابتسامته تملأ المكان فور دخله .. يسلم على الناس بحرارة وخصوصا العاملين بالقهوة .... يقترب منى ويلقى التحية ويقول : ايه يا ابنى فينك مش باين ليه ؟؟ -معلش اصلوا الفترة دى عندى شغل وبقيت اروح القاهرة كتير اليومين دول !! -ربنا يوفقك ... قولى بقا عايزنى فى ايه ؟ -حقولك بس قولى انت الأول ايه يا عم جو الابتسامات والسلامات اللى انت عايشوا ده ...يضحك ويرد : -فى ناس السعادة بتحل بوجودهم والناس تانية السعادة بتيجى بعد رحيلهم .. -عندك حق ... بص يا سيدى انا عايز اتكلم معاك بخصوص الاعتداء الجنسى او التحرش بالاطفال ومع انك شخص قريب منى حبيت اعرف اكتر عن الموضوع ده منك عشان انا عارف انك مريت بالتجربة دى قبل كدة وعايز اعرف منك كل التفاصيل ... ممكن ؟؟ بعد عدة دقائق من الصمت والهدوء التام أجد إبتسامة حزينة وتنهيدة ويحرك رأسه ويوافق.... -عايز تعرف ايه بالضبط ... -عايز اعرف كل حاجة تخيل نفسك لوحدك واتكلم واحكيلى كل حاجة اعتبر نفسك قدام مرايه وبتكلم نفسك -اكتر حاجة بحاول اعملها انى اقنع الناس انى مبسوط والجميل ان كل الناس مقتنعين بكده حتى اقرب الناس ليا.. اهلى فى البيت شايفينى مبسوط وصحابى وحتى القهوجية و صاحبتى ..بس هل أنا مبسوط ؟؟ أنا لحد دلوقتى فاكر كل حاجة لحد دلوقتى مابعرفش أنام ..كل ما بروح فى النوم أحس أن فى إيد بتحسس عليا مابعرفش أعمل إيه ..أصرخ, أعيط, ولا أسكت وأستحمل ... أنا الموضوع ده للأسف محصلش معايا مرة واحدة ده أتكرر كذا مرة وكنت صغير أوى كنت لسه مداخلتش حضانة ..تخيل طفل لسه مداخلش حضانة تم الاعتداء عليه من رغم انى مكونتش فاهم ايه اللى بيحصل بس مكونتش مستريح ..كنت بقاوم على قد ما اقدر بس كنت بسكت وبخاف اقول لحد !!!!! حصل ده من ابن عمى ولما أهلى سابونى مرة انام عندهم وسافروا.. ودلوقتى مش عارف أللوم مين ..عمى اللى ما اعرفش يربى ابنه ولا أهلى أللى سابونى وأمنوا ناس ماعرفتش تصون الأمانة دى ولا ألوم ربنا اللى ماعرفش ليه خلانى اكون فى الموقف ده وعارف انى حفضل متعذب بقية عمرى ... ولا ألوم نفسى عشان سكت من الاول ومافتحتش بوقى ! انا ماكنش فارق معايا الموضوع وانا صغير عشان مكنتش فاهم بس اتحولت من طفل صغير المفروض بيعيش افضل ايام حياته لطفل من غير حياة !!! لما كبرت فهمت اكتر واستوعبت اكتر للموضوع بس للاسف ماعرفتش اعمل حاجة ... أخترت انى اسكت وانى استنى اليوم اللى انام فيه وماقومش حاولت كذا مرة انتحر ...حاولت كذا انى اروح لدكاترة بس الموضوع بيفشل كل حاجة بقت مكسورة جوايا ....بحاول اضحك واكون مبسوط عشان الناس تحبنى وماتسبنيش لوحدى ... انا خايف افضل لوحدى بضحك وبحاول اقنعهم انى مبسوط عشان يفضلوا معايا لدرجة انى وصلت انى مابقتش عارف نفسى ..يمكن صدقت نفسى انى مبسوط !! جايز ... بس لو عايز الصراحة ..أنا مش مبسوط وعايز أموت بس حفضل اضحك على نفسى وعلى الناس انى مبسوط عشان يفضلوا جنبى ... بس لحد امتى حفضل مستحمل ؟؟؟ -بس انت ناجح ومحبوب وكلنا عارفين انك مبسوط - انا لو ناجح ف ده عشان رفضت اعلق فشلى فى شماعة الظروف انا اخدت الموضوع كتحدى مش أكتر بس عارفين انى مبسوط فبرضه ده شىء عظيم انى عرفت اقنعكم بده .... بس حفضل امسل لحد امتى ؟؟؟ ساد الصمت وتوقف عقلى عن التفكير وحاولت ان اتكلم ولكن بدون جدوى ... رسم تلك الابتسامة الجميلة على وجه ولكنه لم يستطيع ان يمنع دموعه من ان تتوقف ..مسح تلك الدموع وقال ادعيلى وذهب ... راقبته وهو يبتعد ويختفى وسط زحام الناس وضحكاتهم وصوتهم وأدركت مدى الوجع الذى يمر به هذا الصديق .... وادركت ايضا ان السعادة تحل مع وجود اشخاص غير سعداء بالمرة وان رحيلهم عن عالمنا سيكون اكثر راحة وسعادة لهم